🎥 МИЦКОСКИ ГИ ПОВИКА ИСЕЛЕНИЦИТЕ ВО АВСТРИЈА ДА СЕ ВРАТАТ И ДА ИНВЕСТИРААТ ВО МАКЕДОНИЈА Владата создава стабилна и предвидлива бизнис-клима
Премиерот Христијан Мицкоски денеска во Виена се сретна со наши сограѓани од македонската дијаспора, со кои, како што објави на Фејсбук, разговараше отворено за предизвиците, но и за можностите што ги имаме како држава.
Мицкоски на средбите повика „да размислат за враќање, за инвестирање и за активно вклучување во развојот на државата“. Им порача дека како Влада, работат посветено да создадат стабилна и предвидлива бизнис-клима, која ќе ги охрабри таквите чекори.
„Посебно ја истакнав важноста од продолжување и продлабочување на пријателските односи со Австрија. Блискоста меѓу нашите земји е јасна, а таа треба да ја претвориме во уште поголема економска соработка и нови инвестиции. Испратив порака до нашите луѓе во дијаспората, тие се нераскинлив дел од Македонија“, објави Мицкоски на Фејсбук.
Овие средби, напиша Мицкоски, се важни затоа што градат заедништво и доверба.
„Убеден сум дека само заедно, со поддршка од дијаспората и со силни меѓународни партнерства, можеме да ја движиме државата напред. Работиме посветено, чекор по чекор, со јасна цел економски развој и подобар живот за сите наши граѓани“, вели премиерот Мицкоски.
Премиерот, заедно со владина делегација престојува во официјална политичка и економска посета на Република Австрија, во рамки на која, како што е најавено, ќе оствари средба со канцеларот Кристијан Штокер.
Вицепремиерот Александар Николоски, кој е дел од делегацијата, порача дека се посветени сме да овозможат позитивни услови за сите оние кои се спремни да се вратат и да инвестираат во Македонија
„Македонија и Австрија имаат блиска соработка токму порадитоа што голем број Македонци живеат тука. Разговаравме за продлабочување на нашите односи, што би придонело во зголемувањето на економијата и инвестициите во Македонија“, објави Николоски на Фејсбук.
.
