Мицкоски до Трајчулески: Oпозицијата си има свој обвинител, тој обвинител денес ја води истрагата за Кочани и се надевам дека ќе го охрабрите!
Во собраниската расправа, премиерот Христијан Мицкоски се осврна на статусот на државниот обвинител Љупчо Коцевски, одговарајќи на прашање поставено од пратеникот на СДСМ, Митко Трајчулески. Во својот одговор, Мицкоски нагласи дека Коцевски бил избран како предлог токму од опозициските редови.
Трајчулески посочи дека Министерството за правда веќе започнало постапка за разрешување на јавниот обвинител, но, според него, по трагедијата во Кочани, Владата решила да му даде уште една шанса.
-Истрагата за Кочани ја води избран обвинител, предлог на Владата каде најголем чинител беше СДСМ и останатите коалициски партнери, како ДУИ. Што значи дека ние живееме во врвот на демократијата. Ретко видено на Балканот, опозицијата си има свој обвинител. Тој обвинител денес ја води истрагата и се надевам дека ќе го охрабрите, уште еднаш да се врати на назад на трите случаи за кои зборувам. Нема да биде дефокус за мене, 75 човечки животи тоа се трајно загубени животи и болка која семејствата ја носат. Тоа е за да повторува и да не се заборави. Мора да има виновници, сега нема виновници. А во овој случај во истрагата обезбедил 68 лица, рече Мицкоски.
Како што нагласи тој на седницата, нема да се заборават случаите како Модуларната болница, Беса Транс и Ласкарци и оти „нема да помогне ниту шверцерски поминатиот Кривичен законик со европско знаме“.
Пратеникот Трајчулески рече дека не е задоволен од одговорот на Мицкоски затоа што клучното прашање не е кој го избрал јавниот обвинител, туку дали Владата стои на ставот, кој го достави до Советот за јавни обвинители врз основа на мислење на Министерството за правда, за разрешување.
-Бараме одговори кои се мотивите за промената на таквиот став и се надевам дека министерот за правда еднаш ќе нè удостои нас како пратеници да поставиме прашање, затоа што е прашањето дали тој стои на тој став, рече Трајчулески.
Тој рече дека се интересираат до каде е предлогот на владејачката партија ЗНАМ за избор на обвинител со двотретинско мнозинство со мандат од шест години и дали тоа ќе влезе во закон, а не е прашањето чиј е Коцевски.
