Мицкоски: Би сакал сите работници да земаат 1 000 евра минимална плата, но потребен е договор на ЕСС, ова не е тема за политички поени

Премиерот Христијан Мицкоски денеска изјави дека сака минималната плата да биде 1.000 евра наместо сегашните 500, но нагласи дека тоа прашање треба да се решава на Економско-социјалниот совет (ЕСС). Тој апелираше до „вистинските синдикалци“ да се дистанцираат од политичката реторика, бидејќи, според него, опозициските политичари ги злоупотребуваат, и да се фокусираат на реални синдикални права.

Одговарајќи на новинарски прашања во Петровец, Мицкоски потенцираше дека без договор меѓу синдикатите и работодавачите не може да се донесе нов закон, особено во предизборен период. Според него, услугите се главниот фактор за инфлацијата, а просечната плата расте за 11% при инфлација од 4,5%, што значи дека нето-платата е зголемена.

„Ова не е тема за политички поени, туку за институционална расправа. На последната седница на ЕСС имаше различни ставови, но не и непремостливи разлики. Со конструктивен дијалог може да се најде решение што Владата ќе го почитува,“ рече премиерот.

Тој потсети дека Владата, како најголем работодавец, постигнала договор за зголемување на платите во образованието, здравството, МВР, МО и во сите институции, со што повеќе нема плати еднакви на минималната. За останатиот дел, нагласи, одговорни се синдикатите и работодавачите.

Мицкоски повтори дека цените во услугите ќе растат сè додека граѓаните се подготвени да ги плаќаат, а нивното намалување ќе се случи дури кога побарувачката ќе опадне, бидејќи Владата не може директно да интервенира во овој сегмент.