Мицкоски ја поддржува примената на „Безбеден град“ и посакува проширување на целата држава

Премиерот Христијан Мицкоски денеска го коментираше новиот систем „Безбеден град“, кој започна со работа вчера. Според најавите, во декември системот ќе испраќа само опомени, додека од јануари ќе започне и со казнување на прекршоците.

Мицкоски истакна дека ја поддржува примената на системот и посакува тој да се прошири на целата територија на државата.

„Ја поддржувам примената на ‘Безбеден град’ и се согласувам да се прошири низ целата Македонија. Некои велат дека тоа може да предизвика критики или политички притисок врз Владата, но ние сме подготвени да го издржиме тој притисок само за да спасиме човечки живот. Само во изминативе две недели имавме три жртви во центарот на главниот град. Во разговори со министерот за внатрешни работи, сме подготвени да ги прифатиме сите критики. Ако успееме да спасиме барем еден човечки живот, јас сум подготвен да понесам политичка одговорност, бидејќи тие животи се губат поради непочитување на правила“, рече Мицкоски.

Тој додаде дека прекршоците често се резултат на нерегистрирани возила или поминување на црвено светло, што, според него, претставува сериозен проблем за безбедноста на сообраќајот.