„Месечно се издаваат над 2 милиони рецепти“ – Клековски најавува реформи во ФЗО, дигитален рецепт наместо хартија!
Во Македонија се издаваат повеќе од два милиони рецепти месечно, односно над 24 милиони на годишно ниво, со вкупна вредност од околу 55 милиони евра.
Ова го изјави директорот на Фонд за здравствено осигурување на Македонија, Сашо Клековски, во емисијата „Ноќно студио“ на 4ТВ.
Клековски посочи дека сегашниот систем, кој во голема мера се потпира на хартиени рецепти, претставува сериозен предизвик и за продуктивноста и за контролата. Фондот има обврска да проверува најмалку 3 проценти од рецептите, процес што го спроведуваат фармацевти, што дополнително го отежнува работењето.
„Тоа е практично невозможна мисија – и од аспект на продуктивност и од аспект на контрола“, истакна Клековски.
Како решение, тој ја посочи дигитализацијата, односно воведувањето на електронски рецепти, кои веќе постојат како систем, но се чека усогласување на регулативата за нивна целосна примена. Со новиот модел, матичните лекари ќе вршат дигитална проверка пред издавање на рецептот, кој потоа ќе биде достапен во аптеките и верификуван со електронски потпис.
Според Клековски, ваквиот пристап ќе ја намали потребата од физичко чување на документација, ќе ја зголеми ефикасноста и ќе го намали ризикот од злоупотреби.
Тој посочи дека сличен систем веќе функционира во Србија, каде електронските рецепти довеле до намалување на потрошувачката на лекови за околу 10 проценти.
„Дигитализацијата носи придобивки за сите – граѓаните, здравствените установи и фондот, преку побрзи услуги, подобра контрола и зголемена продуктивност“, нагласи Клековски, додавајќи дека вакви решенија може да се применат и за упати, лабораториски услуги и боледувања.
