Клековски: Аптеките имаат обврска да обезбедат лекови на рецепт, граѓаните да пријавуваат – ние ќе реагираме!
Директорот на Фонд за здравствено осигурување на Македонија, Сашо Клековски, во емисијата „Ноќно студио“ на 4ТВ предупреди на појавата на злоупотреби во здравствениот систем, особено во делот на двојни наплати и неправилности при издавање боледувања.
Клековски истакна дека аптеките имаат законска обврска да обезбедат лекови на рецепт за сите осигуреници, без да бараат тие да бидат целосно платени приватно. Тој нагласи дека граѓаните може да плаќаат само партиципација, но не и целосна цена за лек што е покриен од фондот.
„Ако граѓаните се соочат со вакви ситуации, треба да пријават во фондот – ние реагираме и вршиме контроли“, рече Клековски, додавајќи дека веќе не постојат квоти за лекови и аптеките се должни да располагаат со потребните количини.
Тој посочи дека проблеми со снабдување може да се појават поради прекини во производството, наведувајќи пример со лекови за епилепсија и силни главоболки, каде имало застој поради прекин на производство во Хрватска.
Во делот на злоупотребите, Клековски нагласи дека најголем број претставки се однесуваат на двојна наплата на услуги – односно случаи кога услуга веќе е покриена од фондот, но сепак се наплатува од граѓаните. Особено, како што посочи, вакви појави се забележани кај матични гинеколози.
За справување со овој проблем, фондот спроведува заеднички контроли со Управа за јавни приходи, при што се утврдени значителни неправилности.
„Двојна наплата за услуга што треба да биде бесплатна не е законска и мора да престане“, дециден беше Клековски.
