Меџити: Државата ќе субвенционира набавка на 200 електрични такси возила со 840.000 евра

Со вкупен фонд од 840.000 евра, Министерството за животна средина ќе ја субвенционира замената на 200 постоечки такси возила со нови, целосно електрични автомобили. Ова го најави првиот вицепремиер и ресорен министер, Изет Меџити, по работната средба со претставници на Унијата на здруженија на таксисти.

Според министерот Меџити, иницијативата е клучен дел од владината стратегија за борба против загадувањето на воздухот и подобрување на квалитетот на урбаниот живот.

Финансиската конструкција на проектот предвидува Министерството да покрие 15% од вредноста на возилата. Со просечна цена од 28.000 евра по автомобил, вкупната инвестиција за 200 возила изнесува околу 5,6 милиони евра, од кои државната субвенција ќе биде приближно 840.000 евра.

„Возилото што денес го претставуваме е електрично, со високи еколошки стандарди, без штетни емисии, без бучава и со висока енергетска ефикасност“, истакна Меџити, додавајќи дека замената на старите возила на дизел, бензин или гас ќе се одвива во неколку фази.

Според еколошките проекции, оваа мерка ќе придонесе за намалување на емисиите на јаглерод диоксид за над 2.700 тони годишно, што е еквивалентно на засадување на повеќе од 120.000 дрвја. Дополнително, се очекува и значително намалување на бучавата во градските средини.

Меџити потсети дека оваа иницијатива е дел од поширок пакет на зелени политики, кој веќе вклучува воведување на систем за споделување на 100 електрични возила за јавна употреба, донација на 6 електрични автобуси за Скопје преку програмата „ЕУ за чист воздух“, како и зголемување на капацитетите за мониторинг на квалитетот на воздухот и масовно пошумување.