Марковски ја објави кандидатурата за градоначалник на Скопје: Градот е во агонија, се гуши, тоне, се суши – на Скопје му е итно потребна помош!
Професорот и декан на Градежниот факултет, Горан Марковски, денеска и официјално ја објави својата кандидатура за градоначалник на Град Скопје. Настапува како независен кандидат поддржан од платформата Независни заедно.
Во своето обраќање, Марковски порача дека главниот град се наоѓа во „агонја“ и дека на Скопје му е потребна „итна и безусловна помош“.
„Нашето Скопје е запуштено, загадено, валкано и депресивно. Повеќе од кога и да е му треба јасна визија ослободена од корупција, култура наместо популизам и компетенција наместо импровизација. Скопје моли за шанса од оние што искрено го сакаат,“ изјави Марковски.
Тој нагласи дека својата битка со идеи и концепти за спас и развој на главниот град ја започнува симболично од Камениот мост, како симбол на поврзување, заедништво и истрајност.
Според него, независните кандидати и граѓанскиот активизам се клучни за вистинска демократија, а политичките партии не смеат да бидат единствениот фактор на одлучување. „Без независни личности нема здраво општество ниту силни институции,“ порача тој.
Биографија
Горан Марковски е универзитетски професор и актуелен декан на Градежниот факултет во Скопје. Зад себе има долгогодишна академска и професионална кариера со богат опус на реализирани проекти и дела.
Во својата професионална работа образувал повеќе од 40 генерации инженери, а неговата стручност и јавни настапи се препознаени по независност и доследност.
Марковски е активен во областа на градежништвото и инфраструктурата, со особен фокус на мостови и урбана мобилност – области што ги гледа како основа за развој на Скопје. Неговата визија, како што истакна, е градот да се движи кон модерни концепти: зелени агенди, дигитализација, паметни згради, современ сообраќај и нулта загаденост.
Поддршка од „Независни заедно“
Платформата Независни заедно прва ја поддржа неговата кандидатура, препознавајќи ја, како што велат, неговата „искреност, посветеност и стремеж за подобро Скопје“.
„Скопје и скопјани тоа го очекуваат, посакуваат и заслужуваат,“ порача Марковски во своето обраќање.
