„МАРКАРТ“, „КИЕЛ“ И „КОСТАЛ“ – ОВА СЕ ФИНАЛИСТИТЕ НА ГЕРМАНСКАТА КОМОРА – кој ќе ја добие наградата во рангот на големите компании
Антје Ванделт, директор на АХК Северна Македонија, дел од мрежата на германските стопански комори во странство, со македонските медиуми ги сподели компаниите кои ќе ја добијат Германско-Македонската бизнис награда 2025, како дел од првиот Германско-Македонски бизнис самит.
„Некои моменти носат симболика која оди подалеку од самиот настан – тие го отсликуваат она што можеме да постигнеме заедно. Таков значаен момент нè очекува на 12 јуни: со големо задоволство ќе ја доделиме Германско-Македонската бизнис награда 2025, како дел од првиот Германско-Македонски бизнис самит.
Оваа награда претставува многу повеќе од признание – таа е симбол на длабокото и плодотворно економско партнерство помеѓу двете земји, и ја одразува посветеноста на компаниите кои не само што инвестирале во Северна Македонија, туку активно придонесуваат за нејзиниот развој – преку иновации, одговорност и локална интеграција“, напиша таа во својата објава до медиумите.
Натаму, како што продолжи, особено ја радува што Германската комора добила голем број квалитетни апликации од различни сектори, од реномирани компании до динамични мали и средни претпријатија. Жири комисијата имала навистина тешка задача, и затоа и изборот не бил лесен.
„Во категоријата мали и средни претпријатија (МСП), во финалето се:
D.Med Medical, Quehenberger Logistics и Haix Oprema M.
Во категоријата големи компании:
Marquardt Macedonia, Kiel Macedonia и Kostal Macedonia.
Им упатувам искрени честитки на сите финалисти! Без оглед кој ќе ја добие наградата, јасно е дека сите овие компании се одлични примери за визија, посветеност и дух на партнерство – токму она што сакаме да го истакнеме со ова признание.
Со нетрпение го очекувам доделувањето на наградите и уште повеќе – пораката што ќе ја испратиме: дека иднината на германско-македонската економска соработка е силна, иновативна и заедничка“, напиша Ванделт.
