Маричиќ ја презеде функцијата претседател на ДИК
Со свечена заклетва и официјално започна мандатот на Бојан Маричиќ како нов претседател на Државната изборна комисија (ДИК). По преземањето на функцијата, Маричиќ најави ново професионално поглавје насочено кон целосна посветеност на обврските и зајакнување на улогата на институцијата како клучен столб на демократијата.
Во својата прва изјава, новиот претседател на ДИК нагласи дека во претстојниот мандат приоритет ќе биде обезбедувањето законитост, транспарентност и непристрасност во сите изборни процеси. Тој вети развој на капацитетите на стручната служба и континуирана работа на зајакнување на угледот на Комисијата.
Маричиќ изрази благодарност до пратениците за укажаната доверба, како и до политичката партија која ја поддржа неговата кандидатура. Тој упати честитки и до преостанатите членови на Државната изборна комисија, изразувајќи уверување дека низ заеднички и професионален пристап ќе придонесат за унапредување на демократските принципи во интерес на целото општество.
