МАЛКУ ПО МАЛКУ, БРАЌАТА СЕ ДОБЛИЖИЈА ДО 19 ОТСТО, АЗМАНОВ ПОЛЕКА СЕ ПОВЛЕКУВА – сопственички промени во „Реплек“
Полека но сигурно
браќата Пецовски ги засилуваат своите акционерски позиции во фармацевтската
компанија „Реплек“. Тие купуваат по помал број на акции на Берзата од ова акционерско друштво,
но веќе нивниот заеднички капитал се доближува до 19 проценти.
А, за купувањето на
акциите постојано транспарентно ја информираат инвеститорската јавност преку
Македонската берза.
Додека, пак, бизнисменот
Зоран Азманов постепено го продава својот акционерски капитал во оваа
компанија, бидејќи, како што тој неодамна изјави за Фактор, сака своите
средства да ги повлече од акции и да ги инвестира во градежниот бизнис, што
всушност е негов фах уште од стартот на неговата деловна кариера.
„Реплек
АД Скопје објавува дека акционерот со над 5 отсто, воедно и претседател на Управен одбор,Душан Пецовски се стекна со 5 нови акции, со што поседува
вкупно 31.605 или 12,19 отсто од
вкупниот број на акции.
Акционерот со
над 5 отсто Владимир Пецовски се стекна со една нова акција, со што поседува вкупно
16.406 обични акции или 6,33 отсто од
вкупниот број на акции.
Акционерот со
над 5 отсто, компанијата Настел
ДООЕЛ продаде 104 акции, со што поседува вкупно 22.093 или 8,52 отсто од вкупниот број на акции“, се вели во објавата од компанијата на Берзата.
Браќата Пецовски откако
го презедоа кормилото во Реплек од семејството Туџарови, ја „стегнаа“ компанијата
и сега таа покажува солидни деловни резултати и зголемување на производството и
профитабилноста, а се освојуваат и нови пазари.
Нивниот заеднички
капитал сега изнесува 19,52 отсто.
Бизнисмемнот Азманов за Фактор раскажа зошто ги продава акциите.
„Едноставно, со парите сакам повторно да градам во Македонија, и
очекувам дека новата власт тоа ќе ми го овозможи, но, доколку тоа не се случи,
тогаш ќе градам во Грција“, открива Азманов за Фактор.
Тој во разговор за нашата редакцција објасни дека во 2016 година
неговиоте две компании, односно „Интекс“ и „Настел“, купиле 12 отсто од акциите
на „Реплек“, но во изминативе години тој купувал акции и во други македонски
компании и банки што котираат на берзата. Причината била неможноста да се
гради, иако за таа цел биле купени локации.
„‚Настел’ во изминативе шест години инвестираше
на Берзата и купуваше акции, бидејќи од претходната власт бевме ставени на
некаква тајна црна листа, што се манифестираше со укинување на ДУП-ови каде што
сме ги купиле локациите со веќе донесени ДУП-ови, и потоа цели шест години не
се носеа нови ДУП-ови, иако кога ќе се укине ДУП од страна на Уставен суд или
од друга институција, законска обврска на општините, односно на
градоначалниците и советите, е да донесат нов ДУП, со отстранети евентуални
недостатоци доколку ги имал тој ДУП пред да биде укинат. Сето ова придонесе
ние, од фирма која пред 2016 година го држеше пазарот во Скопје со 25 проценти,
дојдовме до тоа што после 2016 година не добивме ниту една дозвола за градба до
ден денешен, а имаме дури 7 – 8 локации каде што има ГУП, а има укинато ДУП-ови
или променети ДУП-ови без никаква основа. ‚Настел’ всушност беше доведен во
ситуација да не може да гради, со цел градежните компании кои беа пулени на
тогашната власт да немаат конкуренција и да можат да го преземат тој дел од
пазарот кој ‚Настел’ го држеше пред 2016 година“, раскажува бизнисменот
Азманов.
Натаму, тој искажа многу
пофални зборови за новото раководство на Реплек, односно за браќата Пецовски, за
кое вели дека ја кренало на нозе компанијата, и дека му е драго што и тој
учествувал во таа пресвртница.
А, Реплек неодамна
изврши поделба на акциите, односно една акција ја подели на 10 со иста
вредност, со цел да привлечат повеќе инвеститори.
„Целокупниот фокус на менаџерскиот тим на ‚Реплек АД’ е ставен на
зајакнување на нашите позиции на домашните и странски пазари, унапредување на
фармацевтското портфолио и зголемување на обемот на работа. Нашата стратегија
за развој дава резултати и ние бележиме раст во континуитет. Последните
финансиски резултати покажаа раст на приходите од продажба во сегментот
фармација за 20 отсто во првите шест месеци од 2024. Нашата динамична и
инвентивна приказна продолжува и тоа е препознато на пазарите. Интерес за нашето
работење има и кај инвеститориската јавност, која сѐ повеќе пројавува интерес
за инвестирање во ‚Реплек АД’. Како менаџмент веруваме во пазарот на капитал и
можностите кои ги нуди и во таа насока донесовме одлука на акционерско
собрание, со која нашата акција ќе ја направиме подостапна за различен тип на
инвеститори. Веруваме дека ваквиот пристап не само што ќе го разигра пазарот на
капитал, туку истовремено ќе придонесе за развој на компаниите кои котираат на
Македонската берза“, се вели во одговорот што го добивме од „Реплек“.
Н.Н.Ф.
