Максим Димитриевски кандидат за Општина Куманово, Мирослав Лабудовиќ кандидат Општина Центар
За Наша Македонија ќе настапи самостојно со свои советнички листи во над 50 општини, но ќе влезе во коалиција со ВМРО-ДПМНЕ за поддршка на кандидатите за градоначалници на претстојните локални избори. Како први кандидати за градоначалници од редовите на ЗНАМ се потврдени лидерот на партијата и актуелен градоначалник на Куманово, Максим Димитриевски, и Мирослав Лабудовиќ за Општина Центар.
Ова денеска на прес-конференција го соопшти портпаролот на Движењето, Никола Мемов, по седниците на Извршниот и Централниот одбор на партијата.
„Централниот одбор ја усвои одлуката за взаемна соработка и поддршка со ВМРО-ДПМНЕ во делот на кандидатите за градоначалници. Оваа одлука значи дека ВМРО-ДПМНЕ ќе ги поддржи кандидатите на ЗНАМ и во тие општини нема да имаат свој кандидат, а од друга страна, Движењето ЗНАМ ќе ги поддржи кандидатите за градоначалници на ВМРО-ДПМНЕ во сите општини, вклучувајќи го и Градот Скопје, каде што ЗНАМ нема да има свој кандидат“, појасни Мемов.
Партијата едногласно ги утврди првите двајца кандидати за градоначалници:
На новинарско прашање зошто ЗНАМ излегува со само двајца кандидати засега, Мемов одговори дека партијата пристапува „многу релаксирано“ и не сака да кандидира градоначалници по секоја цена.
„Засега утврдивме кандидати за градоначалници во најголемата општина во Македонија, тоа е Куманово, и во најзначајната општина во Скопје, тоа е Центар. Процесот на аналитика и проверка за други општини сè уште е отворен и не ја исклучуваме можноста ЗНАМ да има кандидати за градоначалници и во други општини“, додаде тој, нагласувајќи дека фокусот е ставен на сериозни кандидатски листи за советите во над 50 општини.
Мемов порача дека преку своите претставници во локалната самоуправа, ЗНАМ ќе покаже како вистински се управува со општините – чесно, одговорно и со визија.
