Макрон го назначи за нов премиер 34-годишниот Габриел Атал

За нов француски премиер беше назначен Габриел Атал, министер за образование.

Со 34 години тој е најмладиот премиер во модерната француска историја. Тој го надмина и социјалистот Лоран Фабиус, кој имаше 37 години кога Франсоа Митеран го назначи во 1984 година.

Атал ќе ја замени Елизабет Борн, која поднесе оставка по 20 месеци на функцијата. Сето тоа време таа се бореше со немањето мнозинство во парламентот, пишува Би-Би-Си.

Габриел Атал, кој моментално е министер за образование, е близок соработник на Макрон, кој се издигна како портпарол на владата за време на пандемијата на Ковид, според извештаите на медиумите.

Тој сега ќе има задача да ја води француската влада на важните избори за Европскиот парламент во јуни.