МАКОТЕН ДООЕЛ со демант до ДУИ: „Казино Фламинго“ не црта парцели, клевета е дека загрозуваме гробишта
Компанијата МАКОТЕН ДООЕЛ преку писмено соопштение остро ги отфрли наводите изнесени на денешната прес-конференција на Имране Велиу од Демократската унија за интеграција (ДУИ), во кои се споменува нивниот бренд „Казино Фламинго“. Од компанијата апелираат да престанат обидите за злоупотреба на нивниот углед за дневно-политички цели.
Во реакцијата се потенцира дека МАКОТЕН ДООЕЛ, како дел од Групацијата „Новоматик Македонија“, е субјект со странски капитал од земја членка на ЕУ и дека сите нивни инвестиции се реализираат исклучиво според позитивните законски прописи.
„’Казино Фламинго’ не црта градежни парцели, ниту се занимава со урбанистичко планирање. Секое тврдење дека имаме за цел да нарушиме нечие достоинство или да загрозиме земјиште каде има гробишта е чиста клевета со која недозволиво, за сурови политички интереси, се манипулира со најдлабоките верски чувства“, стои во реакцијата на компанијата.
Од МАКОТЕН ДООЕЛ потсетуваат дека брендот веќе 19 години приредува игри на среќа на граничниот премин Богородица, а речиси шест години работи и во центарот на Скопје. Тие додаваат дека нивните досегашни инвестиции во земјава надминуваат 80 милиони евра и дека континуирано манифестираат општествена одговорност преку поддршка на јавното здравство, спортот, културата и бројни хуманитарни иницијативи.
„Ја уверуваме јавноста дека како и досега, така и во иднина, нема со било кој нов инвестициски проект да си го нарушиме нашиот корпоративен углед на сигурен партнер на заедницата“, заклучуваат од компанијата.
