Македонија стартува со изградбата на интерконекторот со Грција
Со потпишување на договорот меѓу НОМАГАС АД Скопје и кумановската компанија „Рапид Билд Доо“, денеска официјално започна реализацијата на една од најважните енергетски инвестиции во земјата – изградбата на гасниот интерконектор со Грција.
Трасата ќе се протега од Гевгелија до Неготино во должина од 68 километри, а инфраструктурата треба да биде завршена за 22 месеца и да влезе во функција во 2027 година.
Проектот е вреден 59,9 милиони евра и се финансира од Владата, Европската инвестициска банка (ЕИБ) и Европската банка за обнова и развој (ЕБОР). Новата цена е за 12 милиони евра пониска од иницијалната проценка на поништениот тендер.
Министерката за енергетика Сања Божиновска изјави дека оваа инвестиција ќе ја зголеми енергетската безбедност, ќе овозможи диверзификација на снабдувањето со гас и ќе го отвори патот за подобра поврзаност со европските енергетски пазари.
„Ова е најголемата енергетска инвестиција во последната деценија. Преку интерконекторот, не само што се поврзуваме со Грција, туку правиме крупен чекор кон енергетска независност и поквалитетна животна средина“, истакна Божиновска.
Таа додаде дека проектот е резултат на блиската соработка со ЕУ, ЕИБ и ЕБОР и ја истакна важноста на политичката волја и регионалната доверба како клучни фактори за успех.
Од ЕИБ, Бјорн Габриел потврди дека финансираат и дел од грчкиот интерконектор, додека за македонскиот дел обезбедуваат 28,9 милиони евра, плус грантови и техничка помош од ЕУ во вкупен износ од речиси 12,5 милиони евра.
„Драго ни е што договорот го доби домашна компанија. Тоа покажува дека македонските фирми можат да конкурираат на меѓународниот пазар“, изјави Габриел.
Фатих Туркменоглу од ЕБОР додаде дека ова е значаен чекор за унапредување на енергетската инфраструктура и дека банката ќе продолжи да ги поддржува ваквите проекти и во иднина.
Извршниот директор на НОМАГАС, Мухамед Елмази, нагласи дека проектот има регионално значење и дека е од особена важност што сите процедури биле завршени во краток рок.
Тони Каранфиловски од „Рапид Билд Доо“ изјави дека добивањето на договорот било резултат на најповолната понуда и вети дека работите на терен почнуваат веднаш.
„Подготвени сме и опремени за квалитетна и навремена реализација. Единствен можен ризик е евентуално доцнење со експропријацијата“, посочи Каранфиловски.
