Македонија наскоро добива трет мобилен оператор – АЕК ќе распише јавен тендер

Агенцијата за електронски комуникации (АЕК) најави дека ќе распише јавен тендер или тендер со јавно наддавање за доделување дозвола за трет мобилен оператор, откако три компании – ОНЕ Македонија, Битстрим Мобиле и е& ппф Телеком Груп – доставија писма за искажување на интерес.

„АЕК на 16.04.2025 година објави Намера за спроведување на постапка на јавен тендер со јавно наддавање (Намера). Времетраењето на јавната расправа по објавената Намера беше заклучно со 16.05.2025 година. По завршувањето на јавната расправа до АЕК пристигнаa Писмa за искажување на интерес од три заинтересирани страни и тоа: ОНЕ Македонија Телекомуникации ДООЕЛ Скопје, Битстрим Мобиле ДООЕЛ Скопје и од е& ппф Телеком Груп Б. В. Бидејќи примениот број на писма за искажување на интерес е поголем од објавениот број на одобренија за користење на радиофреквенции што ќе се издаваат, во согласност со член 134 став (6) алинеја 1, АЕК ќе објави јавен тендер или јавен тендер со јавно наддавање“, наведува АЕК.

ОНЕ Македонија, која беше иницијатор за објавување на Намерата, побара годишниот надоместок за користење на фреквенцискиот спектар да се пресметува од моментот на комерцијално пуштање на мрежата, а не од денот на издавање на дозволата. АЕК го одби барањето, нагласувајќи дека нема законска можност за одложување на плаќањата или нивно привремено намалување.

Од друга страна, е& ппф Телеком Груп ја оцени предложената висина на надоместоците како нереално висока, особено ако се земат предвид инвестициските трошоци за влез на нов пазар. АЕК одговори дека висината на надоместите е утврдена според претходни анализи и е во согласност со регулаторните принципи на објективност и недискриминација.

Битстрим Мобиле, пак, изрази интерес за фреквенции во опсезите 900 MHz, 2100 MHz и 3.х GHz – кои не беа вклучени во првичната Намера. Поради ова, АЕК најави дека дополнително ќе објави нова Намера за тие конкретни опсези.

Со оглед дека бројот на пријавени заинтересирани страни е поголем од бројот на достапни дозволи, АЕК ќе распише јавен тендер со јавно наддавање. Во оваа фаза, право на учество ќе имаат само нови мрежни оператори, со што постојните (А1 Македонија и Македонски Телеком) се исклучени од процесот.

Очекувањата се дека влезот на трет мобилен оператор ќе донесе поголема конкуренција, подобри цени и квалитет на услугите за корисниците.