Македонија го призна ММА како официјален спорт
Македонија влегува во кругот на европските земји што го признаваат ММА како официјален спорт. Министерството за спорт донесе одлука со која мешаните боречки вештини (ММА) добиваат статус на легитимен спорт, ставајќи ја Македонија на листата на само четири европски земји што направиле ваков чекор.
Признавањето на ММА како официјален спорт во Македонија е резултат на долгогодишна посветеност, страст и значајни успеси на македонските борци на домашната и меѓународната сцена. Особено се издвојуваат резултатите на клубот „Д Стронгест“ и борците Даниела Алексовска, Ивица Алексовски и Стефан Пецевски, кои во изминатите две години обезбедија бројни победи, два европски шампиони и бронзен медал од Светското ММА првенство – успеси што го позиционираа македонскиот ММА на светската мапа.
Со ова признание е и официјално формирана Македонската ММА Федерација, предводена од Ивица Алексовски, кој има над 30 години искуство во развој и промоција на боречките спортови.
Во духот на ова ново поглавје, на 6 септември ќе се одржи најголемиот ММА настан досега во Македонија. Организиран од Македонската ММА Федерација и промотерската организација АРММАДА, Скопје ќе биде домаќин на врвни борци од земјава и од светот.
Министерот за спорт, Борко Ристовски, и претседателот на Федерацијата, Ивица Алексовски, најавија дека како специјални гости ќе бидат поканети светски ММА имиња како Александар Волкановски, Александар Ракиќ и Педи Пимблет.
Своите вештини во октагонот ќе ги покажат и неколку истакнати македонски борци – Горјан Славески, Даниела Алексовска, Марко Трајановски и Дино Старчевиќ.
