Македонија 2025 собра 1,3 милиони долари на гала вечера во Чикаго – македонската дијаспора со поддршка за развој на лидерство, едукација и македонските бизниси
Над 400 гости, македонци од дијаспората, пријатели и поддржувачи на развојот на македонската демократија од Соединетите Американски Држави (САД) и Канада беа дел од гала вечерата што се одржа во Чикаго под мотото „Патот до просперитетот“. Гала вечерата во организација на Македонија 2025 имаше донаторски карактер, а беа собрани 1,3 милиони долари кои ќе се насочат во зајакнување и проширување на постојните програми на организацијата кои се наменети за зајакнување на капацитетите на бизнис-заедницата, развој на лидерството и образованието.
Пред многубројните гости и поддржувачи се обрати претседателот на Одборот на директори на Македонија 2025, Мајкл Чкламовски кој во својот поздравен говор се осврна на почетоците на организацијата и визијата и целите, поставени од идејниот основач Џон Битов сениор кој по покана на поранешниот претседател Борис Трајковски, обединил неколку лица од дијаспората за да го помогнат развојот на Македонија со своето знаење и контакти. Никица Мојсоска-Блажевски, извршен директор на Македонија 2025 меѓу другото се осврна и на досегашните реализирани активности и постигнатите резултати во областа на поддршка на развој на лидерство и на млади таленти и во програмите за помош и развој на македонските бизниси.
Во моментов, Македонија 2025 имплементира над 10 програми за поддршка на овие сектори, од кои за најголемата едукативна програма обезбедена преку фондацијата Атанас Близнакоф за студенти годишно се издвојуваат над 300 илјади САД долари.
Извршната директорка на Македонија2025, Никица Мојсоска-Блажевски го истакна значењето на поддршката што ја дава македонската дијаспората и поддржувачите од САД и Канада за јакнење на капацитетите на земјата и нејзиниот човечки потенцијал. Покрај другото, таа се осврна на предизвиците со кои се соочува македонското општество и на бавниот економски и демократски развој и потенцираше: „Потенцијалот за просперитетна иднина е реален, но бара итно и фокусирано внимание, бара обединување. Ве повикуваме сите тука присутни заеднички да го создадеме и реализираме македонскиот сон односно развиена, демократска и просперитетна Македонија, добра за нас, за Балканот и за светот“, истакна Мојсоска-Блажевски. Таа нагласи дека средствата собрани од овој настан ќе бидат исклучиво наменети за поддршка на програмите на Македонија 2025, придонесувајќи за развојот на Македонија преку тековните, но и нови стратешки цели кои се поделени во неколку области: забрзување на обуката за лидерство, проширување на можностите за млади таленти, зајакнување на растот на бизнисот, вклучување на искусни експерти, забрзување на дигитализацијата во Македонија и поголемо поврзување со дијаспората и со дигиталните номади.
Претседателот Стево Пендаровски, кој е и долгогодишен партнер и поддржувач на активностите на Македонија 2025, беше главен гостин на Гала вечерата. Тој во рамките на своето обраќање го подвлече значењето на соработката и јакнењето на врските со дијаспората.
Под покровителство на претседателот Пендаровски, а во соработка со Македонија 2025 се реализира Охрид – кампот за високо-технолошка извонредност, како и образовни активности и други настани преку Претседателскиот центар за политичко образование и други настани.
На Гала вечерата во Чикаго претседателот Пендаровски додели три награди: две Признанија за придонес на припадниците од дијаспората кои им беа врачени на двајца истакнати македонци од дијаспората – Стенли (Наце) Томас од Канада и Влатко Андоновски од САД, а највисокото државно признание, орденот „8ми септември“ му беше доделено на Дејвид Калхун, главен извршен директор на Боинг, за неговиот придонес за развивање на македонско-американските односи.
Дејвид Калхун се заблагодари за наградата и најави дека и понатаму ќе се заложува за интересите на Македонија, преку соработка со Македонија 2025. Тој во интервју, кое на Гала Вечерата го водеше Мајк Зафировски, говореше за важноста на добрите лидери, за приоритетите при водење на компании, но и држави и важноста на невладините организации за поддршка на општествено-економскиот развој.
Присутните ги поздрави и Невенка Димитрова, член на Одборот на директори на Македонија 2025, се заблагодари за присуството и поддршката и ја истакна важноста на организацијата во создавање просперитетна иднина во Македонија.
Гала вечерта во Чикаго беше во духот на македонската култура, традиција и кујна. Пред гостите настапија реномирани македонски уметници кои имаат изградена меѓународна кариера. Познатиот македонски пијанист Дуке Бојаџиев, безвременскиот глас на Крсте Роџевски и волшебната кларинетска уметност на Исмаил Лумановски создадоа музичко ремек-дело и неверојатна атмосфера во која уживаа сите гости, со силни емоции. Гостите, исто така, уживаа во мелодиите на македонската музика, со традиционални ора ширејќи го нашето културно наследство. Македонската химна беше отпеана од нашата позната пејачка Александра Пилева Чадиева, која живее во САД. Ова е втора настан на Македонија 2025 за собирање на средства, по оној во 2015 година, кој се одржа во Охајо, САД.
