Македонците трошат сè повеќе онлајн во странство: 427 милиони евра за една година

Значителен раст на онлајн купувањата во странство бележат македонските граѓани во текот на изминатата година, при што најголем дел од средствата се трошат за авиобилети и резервации за сместување преку интернет.

Податоците од анализата на Асоцијацијата за е-трговија на Македонија, базирана на информации од Народната банка на Република Северна Македонија, покажуваат дека вкупната вредност на е-трансакциите достигнала 427,8 милиони евра, што претставува зголемување од 50 отсто во однос на претходната година.

Во исто време, бројот на трансакции пораснал за 69 отсто и достигнал 12,4 милиони, додека просечната вредност по трансакција се намалила на 34 евра, односно пад од 11 отсто.

Најголем дел од потрошувачката е концентриран во неколку земји, меѓу кои Ирска, Холандија, Обединетото Кралство, САД, Унгарија, Германија, Кипар и Луксембург. Тие заедно учествуваат со 74 отсто од вкупната вредност и 83 отсто од сите трансакции.

Најголем поединечен пазар е Ирска, каде македонските граѓани потрошиле 92,1 милиони евра, што претставува раст од 173 отсто. Таму е регистриран и најголем број трансакции – 4,8 милиони.

Холандија се наоѓа на второ место со 62,4 милиони евра и раст од 49 отсто, додека САД остануваат меѓу најзначајните пазари со 2,1 милиони трансакции.

Најголеми промени во динамиката на плаќањата се забележани во Германија и Кипар, каде бројот на трансакции значително пораснал, додека Луксембург и Обединетото Кралство бележат пад.

Според експертите, ваквите трендови се поврзани со силното присуство на глобални технолошки компании и онлајн платформи во овие земји, како и со развојот на дигиталната трговија и туристичките резервации преку интернет.