МААЕ: Во Иран се пронајдени честички од ураниум збогатен до 83,7 отсто
Инспекторите на Меѓународната агенција за атомска енергија (МААЕ) пронајдоа честички на ураниум збогатен до 83,7 отсто во иранската подземна локација Фордо.
Доверливиот квартален извештај на МААЕ, во кој имал увид АП, и поделен на земјите-членки, се чини дека ќе ги зголеми тензиите меѓу Иран и Западот околу иранската нуклеарна програма, пренесува БТА.
Извештајот на МААЕ, кој се однесува само на „честички“, имплицира дека Иран не создава резерви на ураниум збогатен над 60 отсто. Ова е нивото на кое Техеран веќе некое време збогатува ураниум.
Тензиите се зголемија откако Блумберг првпат објави на 19 февруари оваа година дека инспекторите од Меѓународната агенција за атомска енергија во Иран пронашле честички ураниум збогатени до 84 отсто .
Портпаролот на цивилната нуклеарна програма на Иран, Бехруз Камалванди, минатата недела се обиде да го прикаже откривањето на какви било честички ураниум збогатени до ова ниво како моментален несакан ефект од напорите да се постигне готов производ со чистота од 60 проценти. Сепак, експертите велат дека толку голема разлика во чистотата може да изгледа сомнително за инспекторите.
