Лукашенко тврди: Пригожин се вратил во Русија
Белорускиот претседател Александар Лукашенко, кој посредуваше во договорот за ставање крај на вооружениот бунт во Русија минатиот месец, изјави во четвртокот дека водачот на руската платеничка група Вагнер, Евгениј Пригожин, повеќе не е во Белорусија, туку се вратил во Русија.
На 27 јуни, Лукашенко рече дека Пригожин пристигнал во Белорусија како дел од договорот за ставање крај на бунтот.
Но, во четвртокот, тој им рече на новинарите: „Што се однесува до Пригожин, тој е во Санкт Петербург. Не е на територијата на Белорусија“.
Пригожин го шокираше светот минатата недела со покренување на вооружен бунт кој ненадејно го прекина кога неговите борци се приближија до Москва. За возврат, тој доби егзил во Белорусија, а руските власти се откажаа од кривично гонење.
Белорускиот претседател изјави и дека борците на приватната вооружена група Вагнер се во нивните логори и оти мисли дека тие никогаш нема да земат оружје против неговата земја.
Тој, исто така, повтори дека понудата борците на Вагнер да останат во Белорусија сè уште постои.
Лукашенко гордо зборуваше за неговата улога во ставањето крај на вооружениот бунт, за кој рускиот претседател Владимир Путин рече дека можел да ја втурне Русија во граѓанска војна. Минатата недела Лукашенко рече дека го убедил Путин да не го „брише“ Пригожин.
Но, многу останува нејасно за условите на договорот постигнат со посредство на Лукашенко и дали тој се спроведува како што е договорено.
Во средата, руската државна телевизија го нападна Пригожин и рече дека истрагата за тоа што се случи сè уште енергично се води.
Во однос на Украина, Лукашенко рече дека ќе се обиде да направи нешто сериозно на фронтот пред претстојниот самит на НАТО, оценувајќи дека Украина ќе ја „закопа“ својата воена способност доколку ги уништи своите најдобри резерви во обид да направи нешто сериозно пред тој самит. .
Големи амбиции
Рускиот генерал-полковник Андреј Картаполов, влијателен пратеник кој претседава со комисијата за одбрана на Думата, рече дека поттик за бунтот е несогласувањето на Пригожин со барањето на руското Министерство за одбрана членовите на неговата платеничка група да потпишат договори со Министерството за одбрана.
На 11 јуни, Пригожин рече дека членовите на Вагнер нема да потпишат никаков договор со министерот за одбрана Сергеј Шојгу, тврдејќи дека Шојгу не е способен да управува со воените единици.
Картаполов рече дека откако Пригожин одбил да ги потпише договорите, му било кажано дека неговите платеници повеќе нема да се борат во Украина и затоа нема да добиваат државни пари. После тоа, Пригожин извршил предавство поради „преголеми амбиции“, пари и, како што рече, „возбуда“.
САД тврдат дека немаат никаква врска со тоа
Директорот на ЦИА, Вилијам Барнс, му се јавил на шефот на руското разузнавање Сергеј Наришкин по минатонеделниот пуч во Русија за да го увери Кремљ дека САД немаат рака во тоа, објавија во петокот Њујорк Тајмс и Волстрит журнал.
Телефонскиот разговор на Бернс со Наришкин, директорот на руската разузнавачка служба СВР, се одржа минатата недела и беше контакт на највисоко ниво меѓу двете влади од обидот за државен удар, објави Волстрит журнал.
Американскиот претседател Џо Бајден минатиот понеделник изјави дека краткото востание на руските платеници против Кремљ е дел од борбата во рускиот систем и дека САД и нивните сојузници не се вклучени.
