ЕВН со детали по драмата во Слупчане: Искршени катанци и насилен влез во објект каде е предизвикан дефект, повеќето села без струја!
Од ЕВН информираат дека во вчерашните доцни часови, лица од Слупчане насилно и противзаконски отвориле голем енергетски објект во припадност на Електродистрибуција во обид сами да го вратат напојувањето со електрична енергија во селото.
Според компанијата, по ваквиот обид на самоволно противправно приклучување, предизвикан е дефект од големи размери кој ги остави и соседните села без струја.
„Ваквите манипулации од нестручни лица се крајно небезбедни може да имаат многу трагичен крај со смртни последици.
Село Оризаре, Ваксинце и Лојане денес се соочуваат со дефект благодарение на жители од село Слупчане.
Електродистрибуција и денес го потврдува истото. Мештаните на Слупчане не дозволуваат операторот на дистрибутивниот систем да ги исполни своите законски обврски да ја одржува, надградува и да постави системи за точно мерење на електричната енергија“, велат од ЕВН.
Според нив, екипите не може да го санираат дефектот се додека не добијат цврсти гаранции дека ќе се овозможат нормални услови за работа.
„Дефекти предизвикани од неовластени манипулации како во случајов, одземаат многу време да се санираат. Кражбите на електрична енергија во ова село се 80%, а наплатата е само 20%.” велат од компанијата.
