Лидерите на ЕУ ја поздравија промената на власта во Полска
Врвните претставници на Европската унија позитивно реагираа на претстојната промена на власта во Полска, откако поранешниот опозициски лидер Доналд Туск беше избран од парламентот за следен премиер на земјата, јави ДПА.
„Вашето искуство и вашата силна посветеност на нашите европски вредности ќе бидат вредни за создавање посилна Европа“, напиша претседателката на Европската комисија Урсула фон дер Лајен во Ex.
Претседателот на Европскиот совет, Шарл Мишел, од своја страна, му честиташе на Туск по повод гласањето на полскиот парламент. „Вашето искуство и посветеност на европските вредности ќе помогнат да се создаде посилна и пообединета ЕУ“, нагласи Мишел.
Претседателката на Европскиот парламент Роберта Мецола напиша дека сега актуелните предизвици ќе се надминат заедно. Таа додаде дека со нетрпение очекува „да работиме заедно за просперитетна Полска и посилна Европа“.
Туск е лидер на либерално-конзервативната Граѓанска коалиција. Синоќа ја доби поддршката од парламентот, наследувајќи го Матеуш Моравјецки од конзервативната партија Право и правда.
ПиС стана најсилната парламентарна група по изборите на 15 октомври, но не успеа да освои мнозинство. Спротивно на тоа, трите проевропски партии од претходната опозиција, предводени од 66-годишниот Туск, постигнаа јасно мнозинство во полскиот парламент.
Брисел се надева дека промената на власта значително ќе ги подобри односите меѓу Полска и ЕУ. Во ЕУ нема сомнежи за проевропските позиции на Туск, кој беше полски премиер од 2007 до 2014 година и претседател на Европскиот совет од 2014 до 2019 година, забележува Ројтерс.
