Левица алармира: Шестоодделенци во „Ѓорѓија Пулевски“ во Аеродром учат во влажен подрум, на дел од нив им се слошило
Политичката партија Левица денеска обвини за скандалозни и нехумани услови во основното училиште „Ѓорѓија Пулевски“ во Општина Аеродром, каде, според нивните наводи, ученици од шесто одделение се принудени да следат настава во руинирани подрумски простории.
Од партијата тврдат дека училниците се полни со влага, непријатна миризба и немаат природна светлина, опишувајќи ги условите како „недостоинствени дури ни за затворски ќелии, а камо ли за деца“.
Во соопштението се пренесува и загриженоста на родители, кои, според Левица, алармирале дека на некои од учениците им се слошило и повраќале поради неподносливата миризба на мувла во просториите.
„Ваквото понижување на најмладите е срам за општината и директна одговорност на локалната власт, која наместо да обезбеди елементарни услови за настава, ги изложува децата на здравствен ризик и психолошка траума“, се вели во реакцијата. Левица исто така ја прозва и владејачката ВМРО-ДПМНЕ, потсетувајќи на нивното ветување од пред четири години за целосна реконструкција на училиштата.
Локалниот огранок на Левица во Аеродром бара итно преместување на учениците во соодветни училници каде што ќе може достоинствено да ја следат наставата и да се стави крај на, како што велат, срамната состојба во училиштето.
