Летото 2025 со натпросечни температури, но и нестабилности – опасноста од суши и пожари поумерена од лани
Летниот период (јули, август и септември) годинава се очекува да биде потопол од просекот, со појава на топлотни бранови и повремени нестабилности, покажуваат најновите метеоролошки и климатски анализи.
Според прогнозите, температурите во јули и август ќе бидат за 1 до 2 степени Целзиусови повисоки од климатската норма (1991–2020), особено во низинските и урбаните региони. Веќе денеска се очекува температурите да надминат 40 степени, а првата поголема нестабилност ќе настапи кон крајот на неделата – попладне во петок кон сабота (27/28 јуни). Нова дестабилизација се прогнозира околу 3 и 4 јули.
Според професорите Владо Спиридонов и Ивица Милевски од Природно-математичкиот факултет во Скопје, летото 2025 носи поумерен карактер во однос на минатата година. Во најновиот климатски билтен тие наведуваат дека, иако се очекуваат топлотни бранови со умерен интензитет и зголемени сушни услови, опасноста од екстремни суши и пожари ќе биде помала.
„Излезите од неколку метеоролошки модели укажуваат на синоптички и динамички сигнали за засилено Атлантско влијание, со понизок воздушен притисок над југоисточна Европа и повисок над северните делови од континентот. Овој образец создава поволни услови за летни нестабилности, како што се локални врнежи, грмежливи процеси и атмосфера со динамична циркулација“, посочуваат професорите.
Податоците од ECMWF и Коперниковата служба за климатски промени (C3S) потврдуваат дека температурите во јули и август ќе бидат над просекот, додека количините на врнежи ќе бидат блиску до нормалата, но нерамномерно распределени. Се очекува зголемена веројатност за краткотрајни, но интензивни локални непогоди.
Посебна внимателност ќе биде потребна во втората половина од јули и август, кога фазата на зреење на вегетацијата ја зголемува опасноста од пожари.
