Лекарската комора воведува тримесечна обука за д-р Кузмановски пред продолжување на лиценцата
Комисијата за етички и правни прашања при Лекарската комора го разгледа барањето на д-р Кузмановски за продолжување на лиценцата за работа и одлучи да воведе дополнителни мерки за проверка на стручните способности на докторот.
Според одлуката, пред одобрување на барањето, д-р Кузмановски ќе мора да помине тримесечна специјализирана обука под водство на ментор, по што ќе биде подложен на испит за детална проверка на знаењата и стручните способности.
Комората соопшти дека оваа одлука е донесена со цел да се гарантира заштита на пациентите и да се зачува интегритетот на лекарската професија. Истовремено, се истакнува дека Лекарската комора ја користи законската можност за засилена контрола и едукација, бидејќи во моментов не постои судска пресуда или друг правен акт кој би условил одбивање на барањето за лиценца.
Паралелно со тоа, тече и сеопфатна постапка поврзана со етичкото однесување на д-р Кузмановски, а Комората јасно ја изрази моралната осуда за неговите постапки, потенцирајќи дека тие го нарушуваат угледот на професијата.
Конечната одлука за лиценцата ќе биде донесена по добивање на извештаите од Министерството за здравство и Универзитетската клиника за неврологија, кои треба да ја оценат целокупната професионална и стручна способност на докторот.
