Ле Пен по пресудата за кражба на пари од ЕУ: Вечерва милиони Французи се бесни!
Лидерката на француското Национално обединување, Марин Ле Пен, доби забрана за кандидирање на јавни функции во траење од пет години и беше осудена на четири години затвор. Ле Пен, која ја напушти судницата пред да биде прочитана пресудата, беше прогласена за виновна во случајот на проневера.
Две од четирите години затворска казна се условни – не е јасно дали воопшто ќе отслужи затворска казна. Забраната ги уништува нејзините надежи за кандидатура на претседателските избори во 2027 година.
Марин Ле Пен на француската телевизија TF1 го обвини парискиот судија, кој претходно денес ѝ изрече осудителна пресуда, дека донел „политичка одлука“ – а судот дека се обидел да ја спречи да се кандидира на претседателските избори во 2027 година.
Ле Пен тврди дека владеењето на правото е целосно прекршено.
Ле Пен вели дека судијата ѝ изрекол петгодишна забрана, но не понудил никакво објаснување за таа одлука. Таа најави дека ќе поднесе жалба „што е можно побрзо“ и тврди дека е невина.
„Вечерва милиони Французи се бесни затоа што гледаат дека во Франција, земјата на човековите права, судиите спроведуваат мерки кои се резервирани за авторитарни режими“, рече таа.
Водителот потоа ја праша Ле Пен за можноста Џордан Бардела, 29-годишниот претседател на Националното обединување, да се кандидира за претседателските избори во 2027 година наместо неа.
Ле Пен одговори дека Бардела има многу важна улога во партијата, но дека нема да дозволи да ја елиминираат на ваков начин.
„Милиони Французи веруваат во мене. Се борам за вас 30 години“, додаде таа.
Ле Пен вели дека во демократија „избирачите се тие што одлучуваат“.
