Кузмановски: Загубивме фокус, но зошто да не одиме по победа во Португалија!
По натпреварот истакна дека уште на теренот почувствувал дека загубиле фокус, дека правеа грешки на периоди и со тоа ѝ дозволија на една сериозна репрезентација да се одлепи.
„Максимално се подготвувавме, знаевме против каков противник играме, знаеме која е Португалија, но рековме на стартот на квалификациите ќе се бориме и за прво место во групата. Лошо го отворивме натпреварот, со многу технички грешки, мислам дека не бевме фокусирани. Ќе треба добро да анализираме и да видиме каде погрешивме. Исто така мора да ја подобриме и реализацијата со играч повеќе. Мора да направиме добра анализа, да се одигра уште еден борбен меч на гости и зошто да не одиме на победа. Се трудиме секогаш да дадеме максимум за Македонија“, вели Кузмановски.
Сакал или не, тој беше предводник на овие млади момци, па во таков самоуверен стил го најави и реваншот во Португалија, в недела.
„Сега имаме 2-3 дена добро да се подготвиме и во Португалија да одиграме добар меч. Знаеме дека можеме да се носиме со сите репрезентации. Гледаме дека има изненадувања во овие квалификации. Ќе растеме како екипа, за брзо време очекувам да напредуваме. Со оглед на отсуството на некои играчи, навистина има тежина да се биде лидер. Треба да се биде пример за помладите. Така беше и кога јас бев млад“, рече Кузмановски.
