Кумановскиот градоначалник Димитриевски бара зголемување на пензиите
Кумановскиот градоначалник Максим Димитриевски бара да се зголемат пензиите. Во денешното соопштение за медиумите, Димитриески пишува дека надлежните треба да информираат со колку средства располага фондот и нагласува дека при градењето на праведна држава, важно е еднаквото зголемување на приходите за сите категории граѓани.
-Надлежните итно и најтранспарентно да ја информираат јавноста со колку средства располага пензискиот фонд. Недозволиво е за политичката елита седумдесет и осум проценти покачување на платите додека пак на пензионерите шест проценти. Доколку градиме праведна држава тогаш праведно е процентуално подеднакво покачување на приходите за сите. Да се намали на функционерите и подеднакво да се распредели на останатите, бара градоначалникот на Општина Куманово, Максим Димитриевски.
За Димитриевски, барањата на пензионерите кои преку протестни собири бараат линеарно покачување на пензиите се реални и неопходни, истакнувајќи дека токму тие своевремено беа финансискиот столб во семејството, а денеска се сведени на преживување и елементарна егзистенција на нивните семејства.
-Токму овие генерации на граѓани со лопата и крампа изградија сè во државата и сведоци се како поединци во политиката разграбаа се! Нивните одбитоци за пензиско и инвалидско осигурување во минатото беа основа за создавање на пензискиот фонд, денеска тие не го користат ниту делумно тоа што го уплаќале тогаш. Нема потреба да донираме и да се рекламираме секој месец по социјални мрежи и медиуми, тие средства се граѓански и од буџетот на Македонија нека ги усогласат платите и распределат средствата со Закон, порачува Димитриевски.
