Кубанската електрична мрежа во колапс, милиони без струја

Во текот на ноќта Куба претрпе голем прекин на електричната енергија, предизвикан од колапсот на националниот енергетски систем, соопшти Министерството за енергетика и рударство.

„Околу 20:15 часот во петокот дојде до прекин на електричната енергија во западниот дел на Куба, а тоа предизвика колапс на националниот електроенергетски систем“, соопшти Министерството на платформата X.

Поради застарениот систем за производство на електрична енергија, островот со 9,7 милиони жители веќе претрпе три големи прекини на струја во последните месеци од 2024 година, од кои два траеја неколку дена.

Овие хронични дефекти во електричната мрежа, покрај економската криза во земјава, се и најлоши во последните 30 години. Ова доведе до недостиг на храна, лекови и гориво, како и висока инфлација.

Осумте застарени термоелектрани на Куба, од кои речиси сите беа отворени во 1980-тите и 1990-тите, редовно се расипуваат.

Пловечките електрани изнајмени од турски компании и генератори, кои го надополнуваат националниот енергетски систем, се напојуваат од гориво кое Куба тешко го увезува и често е дефицитарно.

Соочена со вонредна состојба, кубанската влада ги удвои напорите да инсталира најмалку 55 соларни паркови од Кина до крајот на 2025 година.

Според властите, соларните панели ќе произведуваат 1.200 мегавати електрична енергија или 12 отсто од вкупната потрошувачка во земјата.