КУБА ИЗНАЈМИ ЗЕМЈИШТЕ НА ВИЕТНАМСКА КОМПАНИЈА: Што ќе одгледуваат?
Куба донесе историска одлука, oдносно изнајми земјоделско земјиште на виетнамска компанија. Куба објави дека изнајмила земјоделско земјиште на виетнамска компанија за одгледување ориз, истакнувајќи дека за прв пат им го препушта одгледувањето на странци.
Државната земјоделска компанија склучила тригодишно партнерство за заедничко одгледување житарки во покраината Пинар дел Рио, на површина од 3.000 хектари. Информацијата сигнализира дека закупот би можел да биде продолжен, а површината проширена, пишува весникот на Комунистичката партија Гранма.
Куба годишно консумира до 700.00 метрички тони ориз, главно увезен од Виетнам.
Но, снабдувањето со оризот во изминатите години е слабо поради недостигот од конвертибилни валути за увоз на храна, гориво, резервни делови, суровини и земјоделски производи.
Куба најмногу ориз произвела во 2018 година, пред почетокот на кризата, вкупно околу 250.000 метрички тони. Производството во меѓувреме паднало за повеќе од 80 отсто, според заводот за статистика.
