Кривична пријава за полициски службеници за малтретирање
дделот за внатрешна контрола, криминалистички истраги и професионални стандарди при МВР поднел кривични пријави против М.Т., С.Р., и Ф.Ѓ., полициски службеници од ПСОН Аеродром при СВР Скопје, за кривични дела „малтретирање во вршење на службата“ и „нарушување на неповредливоста на домот“.
Како што соопшти Министерството за внатрешни работи, кривичните пријави се поднесени до надлежното Основно јавно обвинителство за гонење организиран криминал и корупција, Одделение за истражување и гонење на кривични дела сторени од лица со полициски овластувања и припадници на затворската полиција.
-Првопријавениот М.Т. и второпријавениот С.Р. на 24.02.2025 пред влезната врата од станот сопственост на лице од Скопје, го известиле дека се дојдени да извршат службен разговор во врска со поднесена поплака од неговата сопруга, но тој не им дозволил да влезат, бидејќи немале налог од суд за влез во неговиот дом. Потоа М.Т. неовластено влегол во домот и насилно почнал да го влече оштетениот, го удирал по ногата и се обидел да го лиши од слобода, при што дејствијата ги презел пред малолетниот син на оштетениот. Со тоа М.Т. сторил две кривични дела односно кривично дело „малтретирање во вршење на службата“ по член 143 од КЗ и кривично дело „нарушување на неповредливоста на домот“ по член 145 ст.2 од КЗ, додека второпријавениот С.Р. заедно со третопријавениот Ф.Ѓ. сториле кривично дело „нарушување на неповредливоста на домот“ по член 145 ст.2 од КЗ, информира МВР.
Одделот за внатрешна контрола, криминалистички истраги и професионални стандарди против полициските службеници М.Т., С.Р. и Ф.Ѓ. поднел и предлог за поведување постапка за утврдување одговорност за кршење на работната дисциплина и за отстранување од работно место – суспензија до завршување на дисциплинската постапка.
