Кривичен ослободи од обвинение директор на Онкологија и двајца доктори – велат не било докажано делото, обвинителката најавува жалба!
Кривичниот суд денеска ги ослободи од обвинение поранешниот директор на Клиниката за онкологија Никола Васев и други двајца доктори.
Тие се товареа за несовесно работење во службата по поднесена кривична пријава од семејство на починат пациент во 2018 година.
Судијката Славица Наумовски, на изрекувањето на пресудата, денеска, посочи дека обвинетите Никола Васев, Игор Стојковски и Марија Симоновски се ослободуват од обвинението, со оглед дека од изнеените докази во текот на постапката не се докажало делото што им се става на товар.
„Јавниот обвинител во текот на судењето не успеа да го докаже точното време на извршување на делото и начинот“, додаде судијката Наумовска.
На ова реагираше и јавната обвинителка Лидија Раичевиќ која во изјава за медиумите најави жалба пред второстепениот суд и рече дека тврдела и ќе продолжи да тврди дека кривичните дела се сторени и тројцата доктори заслужуваат осуда.
„Тоа што го сториле обвинетите и тоа што треба да извлече поука целиот докторски персонал што работи со пациенти на Онкологија, е дека на овие пациенти им е потребна заштита согласно два закони – Закон за здравствена заштита и Закон за заштита на права на пациенти. Тие имаат точно определени права кои што им следуваат и се однесуваат на прием, лекување, терапија, дијагноза, третман, однос на лекари кои што ќе име внесе доверба дека се во сигурни раце и дека можат да очекуваат продолжување со медицинска заштита на нивниот живот. Тоа не го добил овој пациент, кој што е починат во многу тешки услови и околности и заради тоа сметавме дека е сторено кривично дело“, изјави Раичевиќ.
