Кривичен даде амнестија за Јанакиески, Ристески Вељаноски и Атанасовски
Основниот кривичен суд во Скопје одлучи да ја применува амнестијата за обвинетите во случајот „Организатори на 27 април“. Постапката е запренa за ексминистри Миле Јанакиески и Спиро Ристески, поранешниот спикер Трајко Вељаноски и Владимир Атанасовски. Сите тие се обвинети за терористичко загрозување на уставниот поредок и безбедноста.
Судијата Илија Трпков, на почетокот посочи дека настаните во Собранието на 27 април 2017 година не се ниту сечени, ниту монтирани, туку вистински, порачувајќи дека ова е демократска земја и секој има право да порачува што смета, а ние судиите треба да опстанеме и издржиме во процесите.
„Уривањето на Собранието е уривање на државата. Лично и како Совет се уште сме на ставот дека интенцијата на законодавецот со Законот за амнестија беа да не се амнестираат организаторите, но секогаш има едно но, и ЈО и Апелација одлучувале дека тројцата обвинети тука не постапиле спротивно од овластувањата“, изјави Трпков.
Овие обвинети тука, посочи тој, се исти со останатите обвинети во овој суд кои биле амнестирани.
„На крајот ќе излезе дека обвинетите за 27 април сами се организирале и влегле да кршат во Собрание. Тоа им е јасно на сите и на осудените во затворите дека тоа не е можно. Дека не е можно да се пробие полициски кордон на спортски натпревари, а не во Собрание. Но, некој побара од државата да биде амнестиран. Лично јас сметав дека обвинетите ќе одат до крај и ќе го докажат дека не се вмешани, но тоа е нивна одлука и треба да се почитува“, изјави Трпков.
На македонската јавност, нагласи судијата Трпков, и е јасно за кого се носат и како се толкуваат законите.
„За кршењето на законодавниот дом и тепањето национални претставници не може да се каже дека е патриотски чин. Таквото постапување не е патриотско. Најголемиот дел од осудените за овие случаи убеден сум дека се патриоти, и сигурен сум дека со одлуката што следи ќе предизвика остри чувства. И пораката за нив е наведнете ја главата и побарајте прошка од државата како што го направија овие тука. Не дозволувајте некој повторно да ве манипулира. Државата се сака со дела“, нагласи Трпков.
На одлуката може да се поднесе жалба до Апелацискиот суд. Судот ќе ги образложи причините за одлуката во писмен одговор што ќе им биде доставен на обвинетите.
Истовремено, за упадот во Собранието, се води и друг предмет во кој беа обвинети 33 лица, од кои 15 беа помилувани со амнестија, вклучувајќи пет пратеници. 16 лица беа осудени на вкупно 188 години затвор.
