КРИТИЧНО ВО КИЧЕВО, 250 ЛУЃЕ ЕВАКУИРАНИ ВО СПОРТСКА САЛА Поплавите ги оставија без покрив над глава
Околу 250 лица, односно 63 домаќинства, привремено се сместени во спортската сала во Кичево, откако вчерашното невреме предизвика излевање на Зајаска Река и сериозни штети. Сепак, условите таму се ограничени, а граѓаните во моментов немаат соодветни услови за одржување на лична хигиена и капење.
Екипите на ЈП „Комуналец“ и ТППЕ вршат испумпување на водата од подрумите на улиците: Прилепска, Пиринска, Први Мај и 29 Ноември, како и кај домовите покрај реките Треска и Зајашка. Поплавени се и земјоделски површини покрај речните корита во општината, соопшти Центарот за управување со кризи.
Градоначалникот на Кичево, Александар Јовановски, соопшти дека се прават напори да биде обезбедено решение за подобрување на хигиенските услови за сместените лица. Засега не е познато колку долго граѓаните ќе останат во спортската сала. При претходните поплави престојот траел околу една недела, но овојпат, поради поголемите штети, можно е да трае и до две недели.
Надлежните служби информираат дека на терен се работи со целокупната расположлива механизација. Најкритична е состојбата на улицата „Прилепска“, каде водата навлегла во повеќе домови, а трагите на ѕидовите достигнуваат височина и до два метра. Жителите денеска самостојно ја испумпува водата од своите куќи.
Иако Зајаска Река се повлече во своето корито, водостојот и понатаму е зголемен, што создава страв кај жителите од ново излевање. Во меѓувреме, потребни се ќебиња, вода и храна за лицата сместени во спортската сала. Надлежните апелираат донациите да се доставуваат преку Црвениот крст, со цел нивна организирана и транспарентна распределба.
Штети од невремето се пријавени и во Гостивар, Тетово и скопско Сарај. Според најавите на метеоролозите, врнежите од дожд се очекува да продолжат и во текот на целата седмица, што дополнително ја усложнува состојбата на терен.
.
