Крешник Бектеши: Веднаш треба да се намалат цените на транспортот
Министерот за економија Крешник Бектеши се согласува дека во изминатиот период рапидно е намалена цената на дизелот и на другите нафтени деривати, што значи и дека е дојдено време такси-службите и меѓуградскиот автобуски транспорт да ги намали скапите цени и тарифи.
Министерот смета дека не е праведно истите високи цени да се задржат, иако енормно поевтинија сите горива во изминатиот период на берзите., но додава дека за креирање на ценовна политика во таа дејност е надлежно Министерството за транспорт и врски. Тој вели дека овој ресор треба да дејствува иато како кога неговото министерство носело одлуки за замрзнување на цените на одредени цени кај прехранбените производи.
– Во делот на креирање на политиките таму не е надлежно Министертсвото за економија, туку Министерството за транспорт и врски и еве јас можам да ги повикам сите надлежни институции да разгледаат одредени можности за тие цени да се намалат. Логично е веднаш да има намалување во делот на цените за транспорт, имајќи ги во предвид цените на нафтените деривати, рече Бектеши како одговор на новинарско прашање на денешната прес-конференција.
Бектеши е уверен дека трендот на намалување на цените на храната ќе продолжи и понатаму, затоа што се намалени како што рече тој, трошоците на производителите за репроматеријалите, електричната енергија и за гориво.
– Разликата во трошоците за живот и цени на мало за храна и безалкохолни пијалоци е падната за 5,2 отсто во периодот од март 2023 до април 2023 за еден месец. Ако во април инфлацијата на храната била 21,7 отсто, сега е 16,5 во април. Тоа значи дека мерките го дадоа својот резултат. Тоа не е само поради делот на замрзнување на цени, туку и во делот на контролирање на ланецот на трговијата, почнувајќи од производителите па до потрошувачот, смета Бектеши.
