„КРЕНИ – ПРОМЕНИ“: Срамота е највисоките официјални лица да ги бранат реалити програмите

Од тимот на
„Крени – Промени“ во Србија бараат укинување на реалити шоуата кои се емитуваат
кај нив и за кои сметаат дека се еден од факторите кои придонесуваат за
девијантните појави во општеството.

Велат дека во
овие реалити програми пред јавноста се промовираат насилството и криминалот. По
масакрите кои се случија во Србија, каде ученик уби 9 луѓе, а друго младо момче
уби 8 лица, тие почнаа петиција за oдземање на дозволите на два тв канали, Пинк и Хепи.

„Никој не е толку
неодговорен трагедијата директно да ја поврзе со реалити програмите, но никако
не смее да се запостави нивното влијание во промоцијата на насилството и
криминалот во јавниот простор. Срамота е највисоките
официјални лица да ги бранат реалити програмите и да го релативизираат
нивното влијание. Се споменуваат социјалните мрежи како проблем, а на
социјалните мрежи се споделуваат видеа од насилството во реалити програмите. На
телевизија вие воспоставувате образец на однесување, а во емисии каде гостуваат
политичари, каните криминалци и насилници од реалити програми. Со тоа на целото
општество му наметнувате посакуван образец на однесување. Пред 4 години во
реалити на Хепи телевизија се случи инцидент, учесник дојде со пиштол и гледате
дека тоа е промоција на насилство на национална фреквенција“, велат од „Крени –
Промени“  за Фактор.

Снимката ја
доставиле до надлежените институции од каде рекле дека не можат да оценуваат
јутјуб канали.

„Веќе 4 години во
Народното собрание стои народна иницијатива која е поднесена и со која се бара
половина час програма за деца, половина час програма за малолетници и
ограничување на реалити програмите“, додаваат од „Крени – Промени“.

Во Србија често
во билтените на полицијата има грозоморни настани, тепачки, убиства. И
просветните работници во Србија бараа забрана за реалити. Во најновиот
инцидент, момче на возраст од 13 години со секира и нож повреди мајка и син во
Војводина. Опозицијата во Србија организираше протест против насилство, но
власта тврди дека фотографиите од овој протест се фотошопирани и дека немало
масовност. За да го релативизираат насилството, дел од српските владини
функционери во телевизиски гостувања набројуваа колку престрелки се случиле во
САД или некоја друга земја.  Во реалити
програмите има навреди, пцовки, тепачки, експлицитни сцени и слично.

Сања Атанасовска