КРАДЕЛ НА ПЕЛОПОНЕЗ: Уапсен е македонски државјанин со „богато“ криминално досие
Македонски државјанин со „богато“ криминално досие е уапсен во Грција. Тој учествувал во киднапирање и кражби на банки.
Двајцата, сега веќе уапсени странски државјани, вчера наутро насилно влегле во дом во општина Триполи на Пелопонез, под закана со оружје и нож и со употреба на сила нападнале три лица, ги врзале, одзеле поголем износ на пари и накит, а потоа побегнале. Едниот веднаш е уапсен, а другиот успеал да побегне, но по организираната акција на полицијата бил пронајден во планинско подрачје. Двајцата се товарат за учество во криминална организација, кражба, фалсификување, фалсификување потврди, за прекршување на законската регулатива за поседување оружје, додека пак 45-годишниот е обвинет и за бегство од затвор. Државјанин на Северна Македонија, кој издржувал затворска казна, по добиената неколкудневна дозвола за излез пред три месеци, не се вратил во затвор, а уапсен е во централниот дел на Пелопонез по извршена кражба во дом заедно со уште едно лице, јави дописничката на МИА од Атина.
Станува збор за 45-годишен маж со „богато“ криминално досие во Грција, а во грчките медиуми и во минатото се споменуваше, но и сега дека учествувал во киднапирањето на бродосопственикот Периклис Панагопулос, во јануари 2009 година.
Уапсените се превезувале со изнајмен автомобил на кој му ставиле украдени регистарски таблици, а при претресот на возилото било откриено оружјето, како и фалсификувани лична карта и возачка дозвола изадени во Хрватска.
Кај двајцата биле пронајдени и украдените пари и накитот. Според информациите на дописничката на МИА од Атина, едниот уапсен е Албанец, а другиот, 45-годишниот е државјанин на Северна Македонија, кој издржува затворска казна за кражби на банки во Грција, извршени пред повеќе од десет години.
