Ковачевски: Компаниите кои не ги намалија цените нема да добијат повеќе субвенционирана струја

Премиерот Димитар Ковачевски денеска на презентацијата на втората инвестиција на „Гересхајмер“ рече дека, според него, најповолен е моделот според кој ќе се укине субвенционираната струја од 80 евра за мегаватчас за компаниите од прехранбениот сектор што не ги намалиле цените во меѓувреме.

Претходно, министерот за економија Крешник Бектеши рече дека од 1 март треба да се укине субвенционираната електрична енергија за сите компании, бидејќи се покажало дека нема ефект од мерката и дека со тие пари подобро е да им се помогне на најзагрозените граѓани. Предлогот ќе биде доставен до Владата, а сега Ковачевски вели дека не треба „сите да бидат казнети“.

„Ова беше барање на стопанските комори и кажавме дека ќе излеземе во пресрет за да се намали цената на основните прехранбени производи до 10 отсто. Имаме намалување на цените кај добар дел од нив од 7 до 12 проценти, но и кога ќе ја видиме месечната инфлација има два месеци по ред намалување.

Има компании кои немаат намалување на цените, а Државниот пазарен инспекторат веќе ја направи анализата зотшо е тоа така. Доколку нема објективни причини за да не биде намалена цената, нема да добиваат субвенционирана електрична енергија. Тоа се средства на граѓаните за да се намалат цените за граѓаните. Мојот пристап е токму тие компании повеќе да не добиваат субвенционирана електрична енергија. Кога беше 350 евра мегаватчас, ние ја финансиравме да биде до 80 евра за мегаватчас“, искоментира Ковачевски на новинарско прашање.