Kосовската полиција се повлекува од општинските згради на северот на Косово
Повлекување на косовската полиција од општинските згради на северот на Република Косово денеска почна врз основа на одлука на приштинските институции.
Започна повлекувањето на полицијата од три општински згради во Звечан, Зубин Поток и Лепосавиќ, изјави за Танјуг заменик директорот на полицијата за северниот регион Ветон Ељшани.
Владата на приштинските институции во вторникот објави дека по средбата меѓу главниот преговарач Бесник Бисљими и специјалниот претставник на ЕУ Мирослав Лајчак се договориле веднаш да го намалат присуството на полицијата во и околу општинските згради на северот на Косово за 25 отсто, како и да се одржат вонредни избори во четири општини на северот по летото.
Дополнително, доколку е потребно, косовската полиција, заедно со ЕУЛЕКС и КФОР, ќе ја проценат безбедносната ситуација и ќе ја разгледаат можноста за дополнително намалување на полициското присуство во и околу општинските згради.
Во соопштението на владата во Приштина, се додава дека Европската Унија ќе ги покани главните преговарачи во Брисел, со цел да се финализира планот на Договорот за нормализација, по што, како што се наведува, ќе се реализираат сите членови од договорот.
