Косово се изрезили со Андора, Шкотска ја урна Шпанија, а Ковачиќ ја освои – Турција (ВИДЕО)
Иако Косовците имаат одличен тим со низа ѕвезди од Рахмани, Рашица, Муричи, Бериша, Војвода, северните соседи доживеаа бламажа како своевремено Македонија, со само реми на домашен терен против слабата Андора и уште на старт си ги искомпликуваа амбициите за висок пласман, па и борба за првите две позиции со второто реми во низа.
Едон Жгерова, кој влезе на стартот на вториот дел ја проби Андора со гол после безмалку еден час мачење, но само две минути се радуваа Косовците, зашто Берто Росас израмни во 61-та минута и до крајот Андорците успеаа да се одбранат.
Косово со два бода, сега веќе заостанува четири по две кола од Швајцарија која го здроби Израел со 3-0 и Романија која вечерва славеше со 2-1 против Белорусија.
Голема победа слави Шкотска, втора за нив во овој циклус за максимални шест бода, откако после триумфот со 3-0 против Кипар, сега ја победија Шпанија на „Хампден парк“ во Глазгов и тоа благодарение на брилјантниот фудбалер на Манчестер јунајтед, Скот Мектомини.
Фудбалерот за врска даде два од трите гола пред три дена против Кипарците, а сега им даде уште два на Шпанците, прво во седмата, а потоа и во 51-та минута од мечот, па како по обичај за „фуријата“, џабе им беше безмалку 70-те отсто посед на топката.
Шкотска во оваа група сега е прва по две рунди со максимални шест бода, Шпанија со три е втора, Грузија и Норвешка се со по еден, а Кипар кој беше слободен е без бод од еден меч.
Турција имаше три шанси во воведните десетина минути од дербито со Хрватска, но Матео Ковачиќ ги заледи сите во Бурса во 20-та минута, а четири минути во судиското надополнување и ги потопи Турците со втор гол, во две акции на Марио Пашалиќ, за бронзената селекција од Катар да ја запише првата победа, откако останаа без три бода во Сплит пред три дена со примен гол буквално секунди пред крајот за реми со Велс (1-1).
Се обидуваа Турците да се вратат, направија низа можности, но или Доминик Ливаковиќ бранеше или домаќините лошо реагираа во завршницата, па не дојдоа ни до шанса да се понатеваат на бод. Велс ја победи Летонија со 1-0 и сега Хрватска и Велс се лидери со по четири бода, Турција е на три, а Ерменија и Летонија без бодови.
