Коридор 8 се гради со забрзана динамика: Клучните делници во фокус
Инфраструктурните проекти поврзани со Коридор 8 се реализираат со засилена динамика, како во делот на автопатската, така и во делот на железничката мрежа, соопштија надлежните на состанок посветен на напредокот на работите.
Вицепремиерот истакна дека изградбата на железничката линија кон Бугарија ќе биде завршена во предвидениот рок, согласно постигнатите договори меѓу двете земји. Според него, во тек се подготовките за нов тендер за третата фаза од проектот, која ја опфаќа делницата од Крива Паланка до заедничкиот тунел.
Тој посочи дека очекува градежните активности на оваа делница да започнат во текот на летниот период, додека рокот за целосна реализација на железничкиот дел од македонска страна останува 2031/2032 година. Во однос на соработката со Бугарија, беше нагласено дека двете страни треба да работат со усогласена динамика.
За тунелското поврзување, беше истакнато дека ќе продолжат активностите таму каде што претходно застанале разговорите со бугарската страна.
Во западниот дел на Коридорот 8 се планира значајна реконструкција на железничката линија од Скопје преку Јегуновце и Гостивар до Кичево. За делницата кон границата со Албанија постојат планови и политичка волја, но, како што беше нагласено, неопходна е и истоветна посветеност од другата страна.
Според проценките, изградбата на делницата од Кичево до границата со Албанија би чинела околу 2 милијарди евра, што претставува значителна инвестиција во однос на годишните капитални проекти.
Во делот на патната инфраструктура, се истакнува дека автопатите од Тетово до Гостивар и од Гостивар до Букојчани се градат согласно предвидената динамика. Дополнително, во завршна фаза е изборот на изведувач за автопатот Кичево–Букојчани, како и за делницата Скопје–Блаце.
