„Кога ќе носат одлука, да земат сламка и да пробаат да дишат низ неа“
Пациентите со цистична фиброза, меѓу кои има и деца, се револтирани од односот на надлежните.
Тие најавија голем протест утре пред Владата во 12 часот.
Фики Гаспар од Асоцијацијата за цистична фиброза истакна дека во последните две години се излажани со усни изјави и никако не можат да се потпрат на нив.
„Не можеме да бараме од пациентите да не излегуваат на протест и да чекаме дека нешто ќе се среди. А и дека надлежните се одредени личности кои се држат до нивниот збор. Утре пред Влада во 12 протест ќе има, а ги покануваме и сите граѓани што сакаат да не поддржат“, вели тој.
Ивана Атанасоска од оваа Асоцијација им порача на надлежните кога носат одлуки, да земат сламка и да пробаат да дишат низ неа со цел да ја сфатат итноста на состојбата.
„Надлежните кога ќе ги носат наредните одлуки да земат една сламка и да пробаат да дишат низ неа за да ја сфатат итноста на нашата состојба и се надевам дека во тој случај ќе донесат многу побрзо решение и ниту еден живот нема да биде загрозен“, изјави Атанасоска.
