Кочанската болница со недостиг од кадар – специјалисти од Скопје ја почнаа евалуацијата на повредените од пожарот
Како дел од иницијативата на Министерството за здравство за поддршка на регионот, денеска во Општата болница со проширена дејност во Кочани пристигна првата група специјалисти од скопските клиники. Нивната мисија е да ја проценат здравствената состојба на лицата повредени во трагичниот пожар што се случи во клубот „Пулс“ пред два месеца.
Во тимот се вклучени експерти од Универзитетската клиника за пластична и реконструктивна хирургија, КАРИЛ, ГОБ „8 Септември“, болницата „Св. Наум Охридски“, како и од Клиниката за токсикологија. Нивната задача е евалуација на здравствените потреби на повредените, со цел навремено да се обезбедат соодветни терапии, медицински помагала и третмани.
Фондот за здравствено осигурување претходно упати апел до сите повредени лица да се јават во болницата во Кочани најдоцна до крајот на неделата, за да бидат вклучени во процесот на проценка и следење на нивната здравствена состојба.
Сепак, од болницата алармираат за сериозен недостиг од медицински кадар – особено медицински сестри – што дополнително го отежнува третманот на пациентите.
„Голем дел од сестрите веќе се пензионирани, а оние што се останати се прераспределени и работат преку работното време, колку што дозволуваат можностите. Но, ситуацијата е веќе алармантна. Потребни се најмалку уште два тима за рехабилитација, бидејќи третманите нема да завршат за неколку дена“, изјави директорката на болницата, Кристина Серафимова.
Таа нагласи и потребата од психолошка поддршка – не само за повредените, туку и за здравствениот персонал: „Психолошката помош е неопходна, но сè уште се смета за табу. Треба да се охрабрат сите – пациенти и вработени – да побараат поддршка од психолози и психијатри.“
Во наредниот период, болницата очекува да ја активира и хипербарната комора, откако двајца здравствени работници, кои моментално се на обука, ќе добијат соодветна лиценца за работа. Одлуката за користење на оваа терапија ќе ја носат лекарите, врз основа на здравствената состојба на секој поединец, во координација со интернисти.
Во моментов, 40 пациенти редовно добиваат физикална терапија, а дополнителни 70 секојдневно доаѓаат на преврски поради изгореници.
