Филмско грабнување во Неготино: Со пиштол и црни ќеси на главата мачеле маж за да изнудат признание за силување
Основното јавно обвинителство (ОЈО) Кавадарци покрена истражна постапка против двајца мажи од демиркапиското село Корешница (на возраст од 37 и 30 години), кои се товарат за брутално киднапирање и тешко физичко малтретирање на жител на Неготино.
Според деталите од Обвинителството, инцидентот се случил на 12 април. Осомничените го грабнале оштетениот со една единствена цел – да го присилат пред камера да сними изјава во која ќе признае дека наводно ја силувал сопругата на 37-годишниот првоосомничен.
Грабнувањето се одвивало како сцена од криминалистички филм.
Пред да му биде одземен и фрлен мобилниот телефон, жртвата успеала да испрати СМС порака за помош до полицијата. Дополнително, соседите кои биле сведоци на насилното внесување во возилото, веднаш реагирале.
Врз основа на овие брзи дојави, полицијата веднаш ги идентификувала грабнувачите и телефонски ги контактирала. Сфаќајќи дека се откриени и дека полицијата трага по нив, осомничените го прекинале малтретирањето и самите го однеле оштетениот директно во полициската станица во Неготино.
За ова тешко кривично дело (Грабнување), Кривичниот законик предвидува строга затворска казна од најмалку 4 години. Поради сериозноста на делото и основаниот страв дека осомничените би можеле да избегаат или да го повторат делото доколку се бранат од слобода, надлежниот јавен обвинител до судијата на претходна постапка доставил предлог за одредување мерка притвор.
