Кој заложи 2,5 хектари земја и сончева централа за 2 милиони евра? Произведува домати, краставици и пипер за 12 милиони евра годишно!
Струмичката компанија за производство на храна „Оранжерии Хамзали“ ја зголеми кредитната револвинг рамка за 2 милиони евра. За тие пари заложи земјоделско земјиште и сончева централа. Оваа компанија две години по ред од продажба на раноградски зеленчук инкасира над 12 милиони евра, а годинава за првиот квартал има добивка од 781.000 евра
Струмичката земјоделска компанија „Оранжерии Хамзали“ специјализирана за раноградинарски култури ќе заложи своја сончева централа на 0,5 хектари, опрема и 2,7 хектари земјиште во ресенско за 2 милиони евра кај “Комерцијална банка“.
Ова го содржи предлог одлуката што како единствена работна точка ќе се најде на дневен ред на претстојното акционерско собрание на таа компанија закажано за 11 јули. И повеќе од извесно е дека точката ќе помине затоа што компанијата има еден доминантен акционер – домашно физичко лице кој поседува над 90 отсто од сите акции со право на глас во „Оранжерии Хамзали“.
Според информациите што се јавно достапни друштвото кај „Комерцијална банка“ веќе користи рамковен риволвинг кредит со рамка од 8 милиони евра. Со новото дополнително зголемување на рамката „Комерцијална банка“ ќе овозможи фирмата да се изложи уште 2 милиони евра и да се зголеми рокот на риволвингот до јуни 2035 година.
За зголемувањето на револвинг рамката „Оранжерии Хамзали“ ќе гарантира со недвижен имот – земјиште регистрирано во катастарска општина Ресен. На земјиштето има фотоволтаична централа на површина од 0,5 хектари. Тоа значи дека во оптимални услови на таа површина се произведуваат околу 0,25 мегаватчасови електрична енергија во еден час. Од јавно достапната информација може да се заклучи дека фотоволтаичните панели се поставени на кровни конструкции на 3 објекти кои се наоѓаат на земјоделското земјиште кое компанијата го дава под закуп.
Во описот на предлог одлуката пишува дека се става под залог подвижен имот составен од: фотонапонски панели, инвертери, алиминиумска носечка конструкција, ормари за еднонасочна во наизменична струја, разводни ормари, енергетски кабли, соларни кабли, опрема и инсталација.
Проверката што „Фактор“ ја направи во јавната база со податоци на РКЕ покажува дека компанијата „Оранжерии Хамзали“ не е регистрирана како производител на електрична енергија.
Со новиот анекс вкупната изложеност изнесува 10 милиони евра односно 59,4 отсто од книговодствената вредност на имотот на друштвото по последната ревидирана завршна сметка.
„Оранжерии Хамзали“ е речиси целосно ориентирана на домашниот пазар на храна. Во првите три месеци годинава нејзните приходи изнесуваат 2,13 милиони евра и во нив домашниот пазар учествува со речиси 99 отсто. Оперативната добивка за првиот квартал изнесува 984.000 евра, а нето добивката е 781.000 евра.
Оваа компанија во последните три години не делела дивиденда, а нејзините приходи во претходните две години надминувале 12 милиони евра. Најголем акционер е Васе Митев од Струмица и тој поседува над 90 отсто од акциите со право на глас. Едно домашно правно лице поседува 5,4 отсто од акциите, а друштвото има уште 279 мали домашни акционери кои поседуваат околу 4 отсто од акциите.
Р.Ф.
