Кој се возел најмногу, а кој најмалку со владиниот авион?
Од средината на 2024 до крајот на 2025 година, владиниот авион бил употребен околу 40 пати, а најчесто летал кон Будимпешта, покажуваат податоците обезбедени од Службата за општи и заеднички работи, кои ги пренесува Телма.
„Дури седум пати авионот полетал кон престолнината на Унгарија во периодот откако ВМРО – ДПМНЕ состави влада во јуни 2024 година“, објави Телма, додавајќи дека од министрите најмногу летал министерот за транспорт и врски и заменик претседател на Владата, Александар Николовски, кој го користел авионот 11 пати, од кои шест до Будимпешта.
Преку документите се забележува и дека авионот бил упатен на сервис во германскиот град Нирнберг на 12 јануари лани, по што бил искористен за лет до Будимпешта со Николовски во делегацијата. Министерот патувал и до Лондон, Прага, Виена и Истанбул, при што некои летови биле преку Охрид.
Покрај Николовски, најмногу го користела и претседателката Гордана Силјановска Давкова – 13 летови, меѓу кои до Тиват, Подгорица, Тирана, Рим, Истанбул и Копенхаген. Претседателот на Собранието, Африм Гаши, летал седум пати, а премиерот Мицкоски и министерот за надворешни работи Муцунски по три пати.
Документите покажуваат дека два лета биле медицински и за евакуација на граѓани, а авионот се сервисирал девет пати. Летовите се финансираат директно од буџетот, кој го полнат граѓаните, а планот е да се набави уште еден ваков авион.
