Кој годинава ќе продаде леб и брашно за 21 милиони евра и од тоа ќе заработи до пола милион евра?
Скопски „Жито Лукс“ најавува континуитет на успешното деловно работење годинава. Во неговиот план декларира дека очекува раст на добивката пред оданочување за 16% во услови кога од продажба ќе оствари приходи до 21 милион евра
Најголемата индустрија за продажба на леб, брашно и бели пецива скопски „Жито Лукс“ планира добивка од 470.000 евра годинава, пишува во нивниот финансиски план јавно достапен на веб страната на Македонската берза за хартии од вредност.
Оваа компанија годинава планира да направи континуитет во растот на приходите и во зголемувањето на добивката во споредба со 2023 година. Годинава најголемата компанија во скопскиот регион за производство на леб и пецива планира да ја зголеми продажбата за 6 отсто односно за 1,26 милиони евра и таа да достигне речиси 21 милиони евра.
Оперативните трошоци заедно со трошоците на продажба се проектирани на 20,2 милиони евра. Оперативната добивка на компанијата се очекува да биде 724.000 евра и тоа е за 7 отсто подобар резултат од претходната година.
Компанијата својот деловен план за годинава го правела врз основа на проектирана инфлација пониска од 4 отсто (според податоците на централната банка).
И од планот е видливо дека значаен ограничувачки фактор за добивката останува да биде високот ниво на финансиски расходи. На нето основа (разлика меѓу финансиските приходи и финансиските трошоци) тие се планирани на ниво од 254.000 евра. Сепак има подобрување во однос на претходната година и планираните финансиски трошоци треба да бидат за 7 отсто пониски од претходната година.
Добивката (пред оданочување н.з.) пак треба да достигне 470.000 евра односно да се зголеми за 16 отсто што секако е позитивна вест за акционерите на оваа голема прехранбена компанија.
Во сегментот на вложувања компанијата декларира дека годинава ќе вложи 1,2 милиони евра во модернизација на производствениот процес и зајакнување на своите производствени капацитети. Повеќе детали за деловниот план на „Жито Лукс“ може да најдете на следниот линк https://www.seinet.com.mk/Default.aspx?lang=MK&docID=67312
За тоа како „Жито Лукс“ работеше лани повеќе може да прочитате на следниот линк „Жито Лукс“ со најголем профит во десет години! Колкава е добивката?
Р.Ф.
