Кој ќе одговара за уништените јапонски цреши во зелениот појас на Партизанска?

Граѓанската еколошка иницијатива o2 реагира поради, како што велат, целосното уништување на дрворедот со јапонски цреши во зелениот појас на булеварот Партизански одреди, пред Рузвелтова. Од иницијативата тврдат дека минатогодишното т.н. „кастрење“ резултирало со сушење на дрвјата, чии препознатливи цветни крошни на пролет веќе не постојат.

„Помина доволно време за да се видат последиците од нестручната интервенција. Дрворедот е мртов, а виновникот сè уште не е посочен“, стои во соопштението.

Според нив, одговорност за состојбата носи ЈП „Паркови и зеленило“, кое е надлежно за одржување на оваа површина. Тие бараат директорот на јавното претпријатие, Сефи Шабани, да утврди кој ја донел одлуката за сечењето и тоа лице да биде санкционирано.

„Не може секој со пила да крои крошни низ градов. Бараме вработување на стручни лица, а не луѓе по партиска линија“, додаваат од o2 иницијативата.

Дополнително, тие бараат оштетените дрвја да бидат заменети со нови, и тоа со истиот вид – јапонски цреши, со што би се вратила автентичната визуелна слика на овој дел од градот.

Од ЈП „Паркови и зеленило“ засега нема официјална реакција.