Која транспортна фирма ќе ги израдува акционерите со 2,3 милиони евра дивиденда?

Добра вест е кога 58 домашни физички лица ќе наплатат 2,2 милиони евра бруто дивиденда од нивните акции во една транспортна фирма. А кога од тие пари државата преку УЈП и персоналниот данок ќе внесе во централниот буџет над 220.000 евра тоа е за пример и за почит. ОИЛКО е компанија која е пример за прагматичен и успешен корпоративен „џоинт венчр“ на акционери, пример за тоа дека во македонската економска транзиција од државно кон пазарно има и позитивни примери. Можеби и затоа што на некој начин во суштината на своето битисување е „траст фонд“

Акционерите на ОИЛКО се на „слатки маки“. Добија предлог одлука за дивиденда која ќе им донесе бруто износ од 10 евра за секоја акција што ја поседуваат во оваа транспортна компанија специјализирана за превоз на нафтени деривати и запаливи материи.

Дивидендата во бруто износ носи 10 отсто од последната пазарна цена на таа акција која, за волја на вистината, многу ретко се тргува на нашата берза. Последната пазарна цена била 6.000 денари за акција.

Според предлог одлуката вкупниот износ на дивиденда е планиран на 2,3 милиони евра во денарска противвредност. Дивидендата, доколку биде усвоена, е 40 отсто од целата добивка во 2023 година која изнесува 5,7 милиони евра.

Најголем поединечен акционер во ОИЛКО е најголемата македонска компанија за малопродажба на нафтени деривати „Макпетрол“. Од дивидедна на своите 35,6 отсто акции во ОИЛКО „Макпетрол“ ќе добие 819.000 евра. Втор најголем поединечен акционер е Андреја Јосифовски, кој е претседател на управниот одбор на „Макпетрол“ и негов долгогодишен директор. Доколку се усвои предлогот на акционерското собрание закажано за 18 мај Јосифовски за неговите 15 од акциите во ОИЛКО ќе наплати бруто износ од 345.000 евра. Од тој износ државата односно централниот буџет преку персоналниот данок ќе наплатат 34.500 евра од дивидендата на Јосифовски.

ОИЛКО има уште 57 акционери кои ќе наплатат повеќе од еден милион евра бруто дивиденда од нивните акции во ОИЛКО.

Меѓу другите предлог одлуки кои ќе се најдат пред акционерите можеби најзначајна е таа која укажува на цврска решеност на акционерите да ја чуваат стабилноста на компанијата и одржуваат нејзината пазарна позиција. Имено еден од предлозите е ОИЛКО да чува 3 милиони евра за стекнување сопствени акции преку откуп во ценовна маргина од 50 до 100 евра пазарна цена за секоја понудена акција. Иако реално гледано е тешко да се очекува дека акционер што добива 10 отсто дивиденден принос би се откажал од таква акција.

Повеќе детали за предлог-одлуките имате на следниот линк https://www.seinet.com.mk/Default.aspx?lang=MK&docID=67389

Р.Ф.

foto freepik.com/claudiodiv